مَرّة ونَا في التلفزة نتفرجْ... ريتْ العلمْ محلاهْ عالي يُذري
أحمر بلون الدم راسَ مْضَرَجْ... حسيتْ دمعي مْعَاهْ نازل يُجْري

مرة ونا في التلفزة نتفرج

نجمة معاها هلال يحضن فيها... خمسة صوابع بينهم تطوال
هو عشقها بات يحلم بيها... وهي تمطت حاشمة بــــــدلال

مرة ونا في التلفزة نتفرج

ومسحت دمعي وقلت هاذي بلادي... واش لزني يارب ع الهجران
""تونس" عليها القلب د يما ينادي... محروم منها وضامني الحرمان

مرة ونا في التلفزة نتفرج

النخل فيهاهامته مرفوعة.... يحكي حكاية شعب يا ما صبر
بالصبر ولت سيرته مسموعة... وبعد المذلة صار يحيا حر

مرة ونا في التلفزة نتفرج

محلاه وطني في الفصول الكل... ديما ترابه بالعرق معطر
تشم التراب تقول ريحة فل... وتذوق ماه تقول طعم السكر

مرة ونا في التلفزة نتفرج

وين الأحبّا؟؟ وينهم لصحاب؟؟؟ وحدي غريب ودمعتي مسكوبــة
واميمتي مستنية في الباب... تبكي عليا وكبدها معطـــــــوبة

مرة ونا في التلفزة نتفرج
( أماني الكوني )
" اللهجة التونسية "