لنجة بنت ما
(من القصص الشعبية المشهورة في الجزائر - القصة روتها عجوز من منطقة واد سوف -)
شذا يما ذا يدلنا ويدلكم على طريق الشهادة، صاحب الدبير يدبر و النبي شاوي مقدر، حاجيتكم باه جيتكم على وحد الراجل عندو بنية وعندها سبع ولاد، هذيك البنت يخلق الله ما يشاء مزيانة ياسر و كان شعرها طويل ، حتى وحد النهار جات ماشيا للبير تملا الماء معا صحابتها حتى هي باش تعمر الماء لزقت شعر من شعرها في حبل البير، هاي هي روحت حتى جاء خوها باه يشرب حصانو وكيف شاف هذيك الشعرا قسم باليمين غير الطفل لي شعرها طويل كي كيف هذي الشعرا غير يتزوجها، حتى كون تعود لنجة بنت ما،وهز هذيك الشعر و قاسها على لبنات نتاع هذيك لبلاد جات كد شعرت أختو، وبعد قال كون يديها ، وبدا يحضر باش يعرس. نهار عرسها وصات خوها الصغير و قاتلو:"أهرب بالمشطا وكي يلحقوك قولهم ما نعطيها لحتى واحد غير لنجة. قاتلهم هيا توا نروح نجيبها وخلطت عليهم و هربت هي وياه. وطلعو فوق راس لجبل وعادت تطلب في ربي، حتى طلع بيها هذاك لجبل، كي فطنوا بيها أهلها، جاه بوها و قالها :"يا لنجة يا بنتي أعطيني سالف الدلال، نطلع معاك لروس لجبال "ردت عليه هي وقالت :"منين كنا بابا نعطيك سالف الدلال تطلع معايا لروس لجبال،منين كنت عمي أطلع بيا يا جبل أطلع.كيف جاتها مها ،قالتها :"يا لنجة بنيتي أعطيني سالف الدلال نطلع معاك لروس لجبال" ، قتلها:"قتلها منين كنتي ما نعطيك سالف الدلال كيف عدتي عميمتي أطلع بيا يا جبل أطلع . وكيف جاها خوها قالها:"يا لنجة بنت ما أعطيني سالف الدلال نطلع معاك لروس لجبال"، قالت :"منين كنت خويا نعطيك سالف الدلال نطلع معاك لروس لجبال وكيف عدت زوجي أطلع بيا يا جبل أطلع".و بعد راحوا كلهم يبكيو ،وبعد هبطت هيا وخوها وشدت طريق وبدات تمشي تمشي تمشي ،حتى قاللها خوها:"راني عطشت نشرب من ها البير"قاتلو:"هذا بير لحْصُنْ ما تشربش علاش تعود حصان"،وراحو يمشو حتى عرضهم بير آخر قلها:"نشرب"قاتلو:"هذا بير لغزال خايف تعودلي غزال". نحا صباطو عند هذاك البير ومشا شوي وقالها:" خليني نرجع نهز صباطي " قاتلو:"روح رد بالك تشرب" ،راح وشرب وجاها كان لغزال، بكات بكات وربطاتو في حزامها وقعدت تمشي في الغابة حتى عرضها ولد السلطان:"أنت أنس ولا جنس" قاتلو:"أنس كان لقيت من يوانسني" هزها وزوز بيها(زوج بيها)وكان عندوا سبع نساء كي تزوزها راح للحج .واحد النهار تفاهمو نساه السبعة وقالو:" نرموها في البير لي فيه ثعبان"وهذاك الثعبان ما كلهاش.وكيف جا السلطان قلهم وين هي"قالولو:"راهي راحت لا ولاتغير لذبحت لغزال" قاللهم :"هيه نذبحوا هذاك لغزال ناكلوه" وكبف جاو يذبحوه بدا يقول:"يا لنجة بنت ما ،لماس مضات ولبرم غلات على ولد مك باه يذبحوه"وترجع عليه هي وتقول:"ما صبري وصبرك لله الشعر عامي عيني،وثعبان متوسط ركابي ".كيف سمع سلطان هذاك لغزال قالو:"عاود"عاود و أختو ردت عليه،شد السلطان نساه وقالهم:"قروا" قالولو لحقيقة بلي راهم رماوها في البير و شد ذبح كبش رماه لهذاك الثعبان و رمالها هي حبل طلعت بيه وقصت عليه لقصية.السلطان خْرجْ خرج خوها من جلد لغزال ورجع عبد، راح السلطان ودار براح يبرح ويقول:" لا يُقعدْ خايب ولا مليحْ، والناس أُكلْ جي تحمل لحطب ".حرق نساه السبع و بقا يعيش معاها هي وخوها بسلام.وخلاصتْ لحكاية.
2012-09-30, 19:14
