ليه محناش فاهمين الدين
ليه محناش فاهمين الدين
مسلم قبطي مش عارفين
إن محمد وعيسى حبايب
يعني ياريتنا نكون صافيين
***
سيبني أحبك وأنت تحب
دوني تحفظ وبدون ريب
قلب المصري ده أطيب قلب
نبقى صحاب وأخوان وقرايب
لو كان والدي مسيحي أكيد
كان عملو لى زمان تعميد
وأنت كمان لو والدك مسلم
كنت تموت في ديانته شهيد
***
يعني خلاصتُه ملناش ذنب
إن أنا وأنت بنعبد رب
والتفاصيل فيها اختلافات
لكن يجمع بينا الحب
مين قال الدين بيفرقنا
يا سلام لو كلنا حبينا راح ننشأ جيل
ما بيعرف حزازات وتحفظ ولا ريبه يشيل
***
مين قال الدين بيفرقنا أو فيه عراقيل
والدين بيقول عيشوا حبايب كونوا قناديل
والأرض الواحدة بتجمعنا وراوينا النيل
أهدافنا سلسلة مشتركة مفيهاش تعديل
وكتابنا كلام رب العزة زى الإنجيل
مكتوب في الاثنين أتحابوا والحب جميل
***
ومحدش يسمع من جهلة هنا ولا هناك
علشان أمخاخهم تعبانه غاوينها هلاك
وقلوبهم بالحقد دفينه عايزنها عراك
وشعارهم أغرقي يا سفينة وأبذر أشواك
***
يسعدني لو ييجي يزورني أستاذي ميلاد
وأنا لازم برده راح أزوره وأخذ الأولاد
نضحك ونفرفش ونودع بعضنا في وداد
ولا فيه أسوار تفصل بينا ولا فيه أحقاد
***
لو عيسى ومحمد رجعوا مثلاً ده أكيد
حانلاقي البسمة ملازماهم والإيد في الإيد
وكمان لو حسوا بسماحة أهل الأديان
يمكن يستنوا هنا معانا والليل ما يبان
وينور نورهم أيامنا ونعيش في أمان
ونروح وياهم ونجادل ملحد شيطان
***
أنا نفسي أكون رايح أصلي يقابلني يونان
ويقولى إدعيلي وأنا أقوله وإدعيلي كمان
مهو برده أخويا ومن حقه يدعى الرحمن
والمولى رب قلوب صافيه مفيهاش أضغان
والدين لله أما بلادنا فالكل سيان
***
د/ مجدي محمد حسين – رئيس قسم اللغة العربية آداب دمنهور
0114065875
2011-01-15, 22:07
