بسم الله الرحمن الرحيم
ملحمة أكتوبر للشاعر هاشم صديق
لما الليل الظالِم طوّل وفجر النور من عينّا اتحول
قلنا نعيد الماضي الأولى ماضي جدودنا الهَزَموا الباغي
وهدّوا قلاع الظلم الطاغِي

.................

وفي ليلة وكنا حُشود بتصارع عهد الظُلم الشبَّ حواجز
شبَّ موانع جانا هُتاف من عِند الشارِع
قسماً .. قسماً لن ننهار طريق الثورة هُدى الأحرار
والشارِع ثار وغضب الأمة اتمدد نار
والكل يا وطني حِشُود ثُوار

وهزمنا الليل هزمنا الليل
والنور في الآخر طل الدار والعِزة إتهادت للأحرار
وطني انحنا سيوف امجادك ونحنا مواكب تفدي تُرابك
ولِسّه الشارِع بِشهَد لينا في يوم الغضبه حصاد ماضينا.
مشينا نَعَطّر حقل الثورة ِبدَم نفديبو بلادنا الحُره

وكان اكتوبر فجرالغضبه كسرنا قيود الماضي الصعبة
لما مشينا مواكب صَامده تهدِر ... تغلي ... وتهتف راعده:
الرَصاص لن يفنينا الرُصاص لن يفنينا
وسال الدم في أرض الوادِي فدينا النور بالروح يا بلادي
وكانت صفحة حكاها العالم وفجر اكتوبر طَلِّ وسَالم
.................
كان في الجامعة موكب هادر صمَّم يجلي الليل السَادِر
وكان الليل السَادِر غادر فجّر غدرُو سموم دخان
ورُصَاص من صوتو صحا السودان
والشعب الثائر صمّم هادر
يصرع ليلنا الداجِي الطوَّلى وكان القرشي شهيدنا الأول
وما اتراجَعنا حلفنا نقاوِم ليلنا وسِرنا
نذرنا الروح ومَسَكْنا دَرِبنا للشمس النايرة قطعنا بِحور
حلفنا نموت او نلقى النور وكان في الخطوة بنلقى شهيد
بي دَمُو بِيرسُم فجر جديد
...............
يا اكتوبر
انِحنا العِشنا ليالي زمان في قيود ومظالِم وويل وهوان
كان في صدُورنا غضب بركان وكنا بنقسم بالأوطان
نَسَطّر إسمك يا سودان ِبدمانا السالت راويه الساحه
حلفنا نسير ما نضوق الراحه شهرنا سيوف عِصيانا المدني
وكانت وحدة صف يا وطني يد في إيد حلفنا نقاوم
ما بِنتراجع وما بـِنساوم ىبينّا وبينك تار يا ظالِم
خُطانا تسير في درب النصر هُتافنا يدَوِّي يِهزّ القصر
كسرنا حواجِز ....أزلنا موانع صفنا واحِد عامِل وطالِب
زارِع وصانِع
وهزمنا الليل هزمنا الليل

والنور في الآخر طل الدار
والعِزة اتهادت للأحرار
.............
ياساحه القصر.. يا حقل النار
ويا واحه بِتحضِن روح (نَصّار) روينا ورودك دم ثُوار
وشتَلنا فضاك هُتاف أحرار خَطّينا تُرابك أحرف نايره
بتحكي سطور أيامنا الثايرة وشلنا الشهدا مشينا ونهتف
وجرح النار في قلوبنا بينزف سَجّينا الشهدا وجينا نقاوم
ما بنتراجع ما بِنساوم بينا وبينك تار يا ظالِم
.............
وفجأة ونحنا صفوف بتصمم زغرد فجر الثورة الحالِم
والنور في الآخر طل الدار ى والعِزة إتهادت للأحرار
.............
قسماً .. قسماً يا اكتوبر نحمي شِعارك
ونجني ثمارك ونرفع راية الثورة الغاليه
عاليه ترفرف فوق الساريه عليها شِعار الثوره الأكبر
رسُمه النادِر زاهي واخضر ولِسّه بنقسم يا اكتوبر
لما يطِل في فجرنا ظالِم نحمي شِعار الثورة نقاوِم
نبقى صِفوف تمتدّ وتهتف لما يعود الفجر الحالم

ولكن هل حافظنا على القسم؟؟؟؟